វត្តថ្មី ហៅ (គ្រើល) បានស្ថាបនាឡើងក្នុងឆ្នាំ
១៨៧៦ ដោយមានលោកគ្រូចៅអធិការព្រះនាមម៉ាឯក ជាមេគំនិត។ ដីស្ថាបនាវត្តនេះ
មានទំហំ ២៧៦៧៦ម ដែលជាកម្មសិទ្ធ របស់ឧបាសក ត្រោក និង ឧបាសិកា សួស
ដោយអ្នកទាំងពីរជាអ្នកមានសទ្ធាជ្រះថ្លានៅក្នុងព្រះពុទ្ធសាសនាស្រាប់នោះ
គាត់ក៏បានវេរផ្ទេរដីនេះប្រគេនព្រះសង្ឃដើម្បី
បានជាសម្បត្តិក្នុងព្រះពុទ្ធសាសនា ។
វត្តថ្មី ហៅ (គ្រើល) នេះមានអាយុកាល ១៣៧ឆ្នាំហើយ
ព្រមទាំងមានព្រះគ្រូចៅអធិការគ្រប់គ្រងរហូតដល់សព្វថ្ងៃនេះចំនួន៩ព្រះអង្គ
ហើយ ដែលមានព្រះនាម និងស្នាព្រះហស្ថដូចតទៅ ៖
១.ព្រះតេជគុណ ម៉ា ឯក
បានកាន់ដំណែងជាចៅអធិការចាប់តាំងពី ឆ្នាំ ១៨៧៦ ដល់ ឆ្នាំ ១៨៩១
នៅក្នុងរយៈកាលជាចៅអធិការនេះព្រះតេជគុណអង្គនេះមានវិរិយភាពដ៏មោះមុតជួយលើកដំកើងព្រះពុទ្ធសាសនា
ដោយបានស្ថាបនា ព្រះវិហារ ឧបដ្ឋានសាលាមួយខ្នង កុដិ ដាំកូនឈើផ្សេងៗ
ព្រមទាំងបានពង្រាបដីក្នុងទីវត្តឱ្យរាបស្មើរល្អ។ ព្រះតេជគុណ ម៉ា ឯក
កាន់ដំណែងជាចៅអធិការបានចំនួន១៥ វស្សា ក៏បានលាចាកសិក្ខាបទទៅជា
ឃរាវាស វិញ។
២.ព្រះតេជគុណ ចាប ម៉ៅ បានកាន់ដំណែងជាចៅអធិការចាប់តាំងពី
ឆ្នាំ ១៨៩១ ដល់ ឆ្នាំ ១៩៣១
ព្រះតេជគុណអង្គនេះក៏បានយកព្រះទ័យទុកដាក់ក្នុងការឧបត្ថម្ភព្រះពុទ្ធសាសនា
ដូចព្រះចៅអធិការអង្គមុនដែរ គឺលោកបានស្ថាបនា ខឿនព្រះវិហារ
បល្ល័ង្គព្រះពុទ្ធរូប ជីកស្រះទឹកពីរ ដាំឫស្សីជុំវិញបរិវេណវត្ត ចេតិយ៏២
កុដិ១ខ្នង ឧបដ្ឋានសាលា១ខ្នង លោកបានកាន់ដំណែងជាចៅអធិការចំនួន ៤០វស្សា
ក៏ទទួលអនិច្ចធម្ម ទៅដោយរោគ ជរា។
៣.ព្រះតេជគុណ ស្រី ហែម
បានកាន់ដំណែងជាចៅអធិការចាប់តាំងពី ឆ្នាំ ១៩៣១ ដល់ ឆ្នាំ ១៩៥១ ក្នុងរយៈកាលជាចៅអធិការលោកក៏មាន
វិរិយៈភាពគួរសមដែរ ក្នុងការលើកដំកើងព្រះពុទ្ធសាសនា គឺលោកបានជួសជុល
ឧបដ្ឋានសាលា១ខ្នង កុដិ១ខ្នង ចេតិយ៏១។ លោកបានកាន់ដំណែងជាចៅអធិការចំនួន ២០
វស្សាក៏លាចាកដំណែងទៅ។
៤.ព្រះតេជគុណ ព្រុំ ឃុត ព្រះតេជគុណអង្គនេះបានកាន់ដំណែងជាចៅអធិការចាប់តាំងពី
ឆ្នាំ ១៩៥១ ដល់ឆ្នាំ ១៩៥៦ លោកមានប្រាជ្ញាវៃឈ្លាសក្នុងការលើកដំកើង
និងជួយឧបត្ថម្ភព្រះពុទ្ធសាសនា ដោយជួយស្ថាបនា ហោត្រ័យ ជីកស្រះទឹក១
ដាំកូនគគីរ ដូង ហើយបាន បង្កើតសាលាអនុវត្តន៏១ខ្នង។ លោកបានកាន់ដំណែងជាចៅអធិការ
អស់រយៈកាល៥ វស្សា ក៏លាចាកសិក្ខាបទ ជាឃរាវាសវិញ។
៥.ព្រះតេជគុណ មាស ក្រាញ់
បានកាន់ដំណែងជាចៅអធិការចាប់តាំងពី ឆ្នាំ ១៩៥៦ ដល់ ឆ្នាំ ១៩៧៥
ព្រះតេជគុណអង្គនេះមានវិរិយភាពខ្លាំងក្លា ក្នុងការជួយ
និងលើកដំកើងព្រះពុទ្ធសាសនា ជាតិ ជាទីបំផុត។ លោកបានបង្កើត
សាលាបឋមសិក្សាបំពេញវិជ្ជា ៧ថ្នាក់ ឧបដ្ឋានសាលា១ខ្នង
សាលាពុទ្ធិកបឋមសិក្សា១ខ្នង ព្រមទាំងបាននិមន្ត លោកគ្រូអាចារ្យ មកបង្ហាត់
បង្រៀន ភិក្ខុ សាមណេរ អស់រយៈពេល ១០ឆ្នាំពុំដែលខាន។ ម្យ៉ាងទៀត
បានជាវដីនៅខាងមុខវត្ត ដោយមាន លោក រស់ ផាត និងភរិយាបានចេញបច្ច័យចំនួន ១០០០រៀល និងពុទ្ធបរិស័ទ ១០០០រៀល ដើម្បីពង្រីកទីវត្តឱ្យបានធំទូលាយ។
រួចហើយលោកយាយ ហ៊ុន ជាម្ចាស់ដីបានចូលបច្ច័យ មកវិញចំនួន ៥០០រៀល។
រីឯខាងជើងជាកម្មសិទ្ធរបស់ ឧបាសក នាង និងឧបាសិកា ឡី
មានសទ្ធាជ្រះថ្លាវេរប្រគេនព្រះសង្ឃ សំរាប់កសាងសាលារៀន។
ក្រៅពីសមិទ្ធិផល ជាស្នាព្រះហស្ថ ដូចមានរៀបរាប់ខាងលើ
ព្រះតេជគុណអង្គនេះ ជាមួយ ឧបាសក អ៊ុក យូរ និងលោកតា ជាង គឹម
នៅសង្កាត់ច្បារអំពៅ ស្រុកកៀនស្វាយ ខេត្ត កណ្តាល បានពិភាក្សា មូលមតិគ្នា
ជាមួយអាចារ្យ គណៈកម្មការ និងពុទ្ធបរិស័ទជើងវត្ត បានរុះរើ ព្រះវិហារចាស់
ដែលបាក់បែកទ្រុឌទ្រោម ពុំអាចឱ្យព្រះសង្ឃធ្វើសង្ឃកម្មផ្សេងៗបាន
ក៏បានស្ថាបនាឡើងវិញ ក្នុងរយៈកាល ៥ឆ្នាំគត់ គឺចាប់ពី ឆ្នាំ១៩៦៣
ដល់ឆ្នាំ១៩៦៨ ព្រះវិហារថ្មីជាសមិទ្ធិ ដ៏ទំនើប មួយបានលេចរូបរាង
ពេញលក្ខណៈឡើងអស់ តម្លៃ ៦០០០០០រៀល។ ក្រោយពីថ្ងៃ ១៧ មេសា ឆ្នាំ១៩៧៥
រដ្ឋអំណាចបនប្រល័យ ពូជសាសន៏ ជាទមិឡ អន្យតិរ្ថិយ៏ ឥតសាសនា ប៉ុល ពត អៀង សារី
ខៀវ សំផន បានពិឃាដផង បង្ខិតបង្ខំព្រះសង្ឃ អោយលាចាកសិក្ខាបទផង
រហូតអស់ព្រះសង្ឃ ពីប្រទេសកម្ពុជា ទាំងមូល។ បន្តមក បនប្រល័យពូជសាសន៏
បានកម្ទេចវត្តអារាម កុដិ សាលារៀន ព្រះវិហារ ព្រះចេតិយ៏ ខឿនព្រះស្ដូប
និងដុតកម្ទេចបំផ្លេចបំផ្លាញនូវ គម្ពីរដីកា ធម៌អាថ៌ ដែលជាឫសកែវ
ឬគោលចារឹក នៃព្រះពុទ្ធសាសនា ទាល់តែអស់រលីង។ ជាមួយនេះព្រះតេជគុណ
ចៅអធិការ មាស ក្រាញ់ បានកាន់ដំណែងជាចៅអធិការ បាន១៩វស្សា។ ចាប់ពីឆ្នាំ
១៩៧៥ ដល់ឆ្នាំ ១៩៧៩ ព្រះពុទ្ធសាសនាទូទាំងប្រទេស
កម្ពុជាយើងត្រូវបានសាបសូន្យ គ្មានព្រះសង្ឃមួយអង្គឡើយ ដោយពួក បន ប៉ុល ពត
អៀង សារី បំផ្លាញខ្ទេចខ្ទីអស់។
ចាប់ពីថ្ងៃ ៧ មករា ឆ្នាំ ១៩៧៩ មកដល់បច្ចុប្បន្នសព្វថ្ងៃនេះ
ដោយសារគុណរណៈសិរ្សសាមគ្គី សង្រ្គោះជាតិ កម្ពុជា
យកចិត្តទុកដាក់បណ្ដុះបណ្ដាល បង្កើតឱ្យមានព្រះពុទ្ធសាសនា មានព្រះសង្ឃ និង
រៀបចំវត្តអារាម ឡើងវិញនៅទូទាំងប្រទេស។ ដោយឡែក នៅវត្ត ថ្មីគ្រើល
ឃុំអន្សោង ស្រុកកំពង់ត្របែក ខេត្ត ព្រៃវែងយើង ក៏មានជីវិត
រស់រានមានមុខមាត់ ពន្លឺរស្មី ព្រះពុទ្ធសាសនាឡើងវិញដែរ
ដោយការចេះចាំពុទ្ធវចនៈ ផងការស្រាវជ្រាវរាវរកនូវ គម្ពី ដីកា
ព្រះត្រៃបិដកផង និង ទំនាក់ទំនង ជាមួយរដ្ឋ រកព្រះគ្រូឧបជ្ឈាយ៏ បំបួសភិក្ខុ
សាមណេរ ផង របស់ពុទ្ធបរិស័ទ យើង។
វត្ត ថ្មី ហៅ គ្រើល
ក៏មានព្រះសង្ឃបន្តបន្ទាប់រហូតមកគឺ ៖
៦.ឆ្នាំ១៩៧៩ ដល់ ឆ្នាំ១៩៨០ ពុទ្ធបរិស័ទបាននិមន្ត
ព្រះតេជគុណព្រះនាម ប៉ុល មកពីវត្តដកពរឃុំស្វាយធំ ស្រុកស្វាយរៀង
ខេត្តស្វាយរៀង មកគង់ចាំព្រះវស្សា ដើម្បីពុទ្ធបរិស័ទធ្វើ ទាន សីល ភាវនា។
បន្តមកបានលោកតាឧបាសក កែវ សំ ចូលសុំបព្វជ្ជាពីឆ្នាំ ១៩៨១
ហើយក៏ទទួលភារកិច្ចជាប្រធានសង្ឃក្នុងទីវត្ត ថ្មីគ្រើល លុះដល់ឆ្នាំ
១៩៨៣ ព្រះអង្គក៏មានជរាពាធ ចូលមករុករានក្នុងនគរកាយយ៉ាងធ្ងន់ធ្ងរ
ក៏លាចាកសិក្ខាបទទៅជាឃរាវាសវិញ។ ក្នុងដំណាក់កាលព្រះតេជគុណអង្គនេះ
បានស្ថាបនា ឧបដ្ឋានសាលា១ខ្នង និង ជួសជុល កុដិហោត្រ័យ
សម្រាប់ព្រះសង្ឃគង់នៅ ព្រះតេជគុណអង្គនេះបានកាន់ដំណែងជាប្រធានសង្ឃបាន៣វស្សា។
៧.ព្រះតេជគុណព្រះនាម អ៊ុន ហាំ
បានទទួលដំណែងបន្តជាប្រធានសង្ឃពីឆ្នាំ ១៩៨៣
ព្រះតេជគុណអង្គនេះមានព្រះទ័យល្អនៅក្នុងការស្នេហាជាតិកំរិតខ្ពស់
បានខិតខំដឹកនាំពុទ្ធបរិស័ទ ស្ថាបនាសាលារៀនកំរិតសិក្សាទី១ បាន៣ខ្នង
មាន៨បន្ទប់ សាលាទាំងនោះ សុទ្ធតែសង់អំពីគ្រឿងឈើប្រក់ស្លឹក។
ជម្រុញការសិក្សាពីថ្នាក់កំរិតដំបូងរហូតដល់ថ្នាក់ទី៤ មាន៩ថ្នាក់
ក្រៅពីនេះព្រះអង្គមានព្រះទ័យទុកដាក់ ក្នុងការកសាងព្រះពុទ្ធសាសនា
បានកសាងដំបូលព្រះវិហារ ជាវព្រះបដិមា១ព្រះអង្គធ្វើអំពីស្ពាន់
ដំបូលហោត្រ័យ និងអាគារសិក្សា១ខ្នង ដែលជាសទ្ធាជ្រះថ្លា របស់លោកយាយ
មហាឧបាសិកា ឌី ប៉ុក ដែលជាមាតារបស់សម្ដេចអគ្គមហាសេនាបតីតេជោ ហ៊ុន សែន
លើសពីនេះព្រះអង្គយកព្រះទ័យទុកដាក់ក្នុងការការពារវត្តអារាម
ដាំកូនឈើមាន ត្នោត ដូង ស្វាយ -ល-។ លោកបានកាន់ដំណែងជាចៅអធិការបានចំនួន
១៣វស្សា ក៏ទទួលអនិច្ចធម្មទៅ នៅថ្ងៃ ១៤កើត ខែមិគសិរ ឆ្នាំជូត
អដ្ឋស័ក ពស ២៥៤០ ត្រូវនឹងថ្ងៃ ពុធ ខែធ្នូ ឆ្នាំ១៩៩៦ ដោយ ជរាពាធ។
៨.ព្រះតេជគុណ មាស សុខ លោកបានកាន់ដំណែងជាចៅអធិការពីឆ្នាំ
១៩៩៦ ដល់ឆ្នាំ ២០០៤ លោកបានជួយឧបត្ថម្ភព្រះពុទ្ធសាសនា ដោយបានកសាង
កុដិ២ខ្នង ធ្វើអំពី ឈើប្រក់ក្បឿង ជាអំណោយរបស់ ឧបាសក យស់ ឌុល និងឧបាសិកា
វ៉ា ណោ ធ្វើរបងព័ទ្ធជុំវិញ និងគូរគំនូរព្រះវិហារ កសាង សាលាឆាន់១ខ្នង
ជាអំណោយរបស់ឯកឧត្តម ងួន សឿ និងលោកជំទាវ ផឹង ឡៃយ៉ើ ធ្វើខ្លោងទ្វារ២ខាងជើង
ជាអំណោយរបស់ ឯកឧត្តម វ៉ា សំអុល និងលោកជំទាវ នូសុផានី
ចៅអធិការអង្គនេះបានកាន់ដំណែងជាចៅអធិការបាន ៨វស្សា
ក៏បានលាចាកសិក្ខាបទទៅជាឃរាវាសវិញ។
៩.ព្រះតេជគុណ គង់ សាម៉ុន
បានបន្តដំណែងពីឆ្នាំ ២០០៤ រហូតមកដល់សព្វថ្ងៃនេះ
លោកមានស្មារតីស្នេហាជាតិកំរិតខ្ពស់ បានខិតខំដឹកនាំពុទ្ធបរិស័ទ ស្ថាបនា
កុដិហោត្រ័យ ១ខ្នង ជួសជុលកុដិបាន២ខ្នង សាលារៀន១ខ្នងមាន ៦បន្ទប់
ដឹកនាំដោយឯកឧត្តម ញ៉ែម សារ៉ន ដែលជាអំណោយរបស់ សម្ដេចអគ្គមហាសេនាបតីតេជោ
ហ៊ុន សែន និងលោកជំទាវ កិត្តិព្រឹទ្ធបណ្ឌិត ប៊ុន រ៉ានី ហ៊ុន សែន
កសាងសាលាខាន់១ខ្នង ដែលមានបណ្ដោយ ២៩ម ទទឹង ២១ម បានហើយ៨០% បង្គន់អនាម័យ៣
បន្ទប់ អាងទឹក១ ម៉ាស៊ីនភ្លើង២គ្រឿង ចាក់ដីក្នុងទីធ្លាវត្ត និងដាំកូនឈើ កសាងព្រះវិហារ
ក្រាលផ្លូវបេតុង២ខ្សែខាងមុខព្រះវិហារ ខាងមុខសាលាឆាន់ ចាក់សាបធ្វើរបងខាងត្បួងសាលារៀន
កសាងស្រះទឹក កសាងចេតិយរួម របងខាងមុខវត្ត កសាងដងទង់ កសាងកញ្ចុះ ២ ខាងក្រោយព្រះវិហារ
កសាងសួនបណ្ដុះកូនឈើ កសាងកញ្ចុះធ្វើពីឈើ ២ខ្នង កសាងបង្គន់អនាម័យ ៩ បន្ទប់ កសាងសួនច្បារចាក់
បេតុងជុំវិញព្រះវិហារ កសាងក្លោងទ្វាខាងត្បួងវត្ត ជីកស្រះទឹកចាក់ដីបំពេញទីធ្លារវត្ត
កសាងឡដុតសម្រាម និងជីធម្មជាតិ កសាងបច្ឆាបូជាសព ។
* រូបភាពផ្សេងទៀត របស់យើងខ្ញុំ ៖
0 comments:
Post a Comment